संघर्षनामा वृत्तसेवा । श्रीगोंदा
दि .४ नोव्हेंबर २०२५
श्रीगोंदा प्रतिनिधी,
राज्यात सर्वत्र निवडणुकांच्या चर्चेला जोर चढला असताना श्रीगोंदा नगरपालिकेची निवडणूकही आता हळूहळू केंद्रस्थानी येऊ लागली आहे. लागलीच निवडणुकीचा बिगुल वाजण्याची शक्यता व्यक्त होत असून, नगराध्यक्षपदी कोण? या प्रश्नावर गावागावात, चौकाचौकात चर्चेचा विषय रंगत चालला आहे.
जुने अनुभवी चेहरे आणि नव्या दमाचे उत्साही उमेदवार अशी स्पर्धा रंगताना दिसत असताना, याच पार्श्वभूमीवर एक नाव सध्या सर्वाधिक चर्चेत आहे ते म्हणजे सौ. इंद्रायणी प्रतापसिंह पाचपुते.
नगरपालिकेच्या राजकारणात हे नाव नवीन असले तरी पाचपुते घराण्याच्या राजकीय वारशाशी जोडले गेल्यामुळे या नावाभोवती राजकीय वर्तुळात विशेष चर्चा सुरु झाली आहे.
सौ. इंद्रायणी प्रतापसिंह पाचपुते या राज्याचे माजी मंत्री बबनराव पाचपुते यांच्या सूनबाई आणि आमदार ॲड.विक्रमसिंह पाचपुते यांच्या भावजय आहेत. त्यामुळे पाचपुते परिवारातील हे संभाव्य उमेदवार असलेले पहिलेच नाव असल्याने या चर्चेला अधिक वजन मिळाले आहे.
श्रीगोंदा नगरपालिकेत जर पाचपुते घराण्याने उमेदवारी केली तर निवडणुकीचा तोल एका क्षणात बदलू शकतो,अशी कार्यकर्त्यांमधील चर्चा रंगली आहे.
राजकारणात पाचपुते परिवाराने नेहमीच सर्वसामान्य नागरिकांशी जवळीक ठेवली आहे. कार्यकर्त्यांना सन्मान, जनतेच्या अडचणींमध्ये तत्पर सहभाग आणि विकासाभिमुख भूमिका या गोष्टींमुळे या घराण्याचा जनतेत अजूनही विश्वास कायम आहे. त्यामुळेच सौ.इंद्रायणी पाचपुते यांच्या नावावर चर्चा होताच कार्यकर्त्यांमध्ये उत्सुकता आणि उत्साह दोन्ही दिसून येत आहेत.
या अगोदर पाचपुते घराण्याने स्थानिक स्वराज्य संस्थांमध्ये ग्रामपंचायत, पंचायत समिती आणि जिल्हा परिषदेत सातत्याने आपली ताकद दाखवली आहे. बहुतेक वेळा विजय मिळवत घराण्याने आपल्या जनाधाराचे वातावरण वाढलेले आहे.
जर यावेळी सौ. इंद्रायणी पाचपुते नगरपालिकेच्या रणांगणात उतरल्या, तर या परिवारातील सदस्य म्हणून त्या नगरपालिकेची निवडणूक लढविणाऱ्या पहिल्या महिला उमेदवार ठरतील.
एकूणच, श्रीगोंद्यातील राजकारण सध्या सस्पेन्स मोडमध्ये आहे.
पाचपुते कुटुंबाने जर सौ.प्रतापसिंह इंद्रायणी पाचपुते यांच्या नावावर शिक्कामोर्तब केले, तर श्रीगोंदा नगरपालिकेची लढत नक्कीच रंगतदार आणि ऐतिहासिक ठरणार, असा विश्वास कार्यकर्त्यांचा आहे.