संघर्षक्रांती वृत्तवेध - श्रीगोंदा 

दि. 21ऑगस्ट 2026

(उज्वला उल्हारे)

 श्रीगोंदा नगर परिषदेच्या मा. नगराध्यक्षा तथा भारतीय जनता पार्टीच्या श्रीगोंदा तालुका महिला आघाडीच्या मा. तालुकाध्यक्षा सुनीताताई मच्छिंद्र (एम.डी.) शिंदे यांची भारतीय जनता पार्टीच्या अहिल्यानगर दक्षिण महिला आघाडीच्या सरचिटणीसपदी निवड करण्यात आली आहे. त्यांच्या या निवडीबद्दल भाजपा पदाधिकारी, कार्यकर्ते तसेच विविध सामाजिक क्षेत्रातील मान्यवरांकडून त्यांचे अभिनंदन होत आहे.

पक्षाने सोपविलेली नवीन जबाबदारी स्वीकारल्यानंतर बोलताना सुनीताताई शिंदे म्हणाल्या की, भाजपाची विचारधारा, पक्षसंघटनेची रणनीती आणि पक्षाची ध्येयधोरणे तळागाळातील वंचित घटकांपर्यंत पोहोचविण्यासाठी आपण प्रभावीपणे काम करणार आहोत. पक्षसंघटना अधिक मजबूत करण्याबरोबरच महिला संघटन वाढविणे, महिलांना राजकीय व सामाजिक क्षेत्रात सक्षम करणे तसेच त्यांच्या प्रश्नांसाठी सातत्याने पाठपुरावा करण्याला प्राधान्य राहील.

महिलांच्या विविध समस्या, सामाजिक प्रश्न आणि न्याय्य हक्कांसाठी संघटितपणे आवाज उठविण्याबरोबरच महिला सक्षमीकरण आणि न्यायिक रणनीतीच्या माध्यमातून पक्षाची भूमिका अधिक प्रभावीपणे जनतेपर्यंत पोहोचविण्याचा प्रयत्न करणार असल्याचे त्यांनी सांगितले.

सुनीताताई शिंदे यांच्या निवडीबद्दल मा. मंत्री बबनराव पाचपुते, परिक्रमाच्या अध्यक्ष डॉ. प्रतिभाताई पाचपुते, आमदार विक्रमदादा पाचपुते, परिक्रमा शैक्षणिक संकुलाचे मुख्य कार्यकारी अधिकारी प्रतापसिंह पाचपुते तसेच भारतीय जनता पार्टीच्या वरिष्ठ पदाधिकारी व कार्यकर्त्यांचे त्यांनी आभार मानले.

श्रीगोंदा नगर परिषदेत नगराध्यक्षा म्हणून काम करताना तसेच महिला आघाडीच्या माध्यमातून संघटनात्मक पातळीवर केलेल्या कार्याची दखल घेत त्यांच्यावर दक्षिण अहिल्यानगर महिला आघाडीच्या सरचिटणीसपदाची जबाबदारी सोपविण्यात आली आहे. या नव्या जबाबदारीच्या माध्यमातून त्या महिला संघटनेला अधिक बळकटी देत पक्षसंघटना तळागाळापर्यंत पोहोचविण्यासाठी महत्त्वाची भूमिका बजावतील, असा विश्वास भाजपा कार्यकर्त्यांकडून व्यक्त होत आहे.