संघर्षक्रांती वृत्तवेध - श्रीगोंदा 

दि. 21 ऑगस्ट 2026

(उज्वला उल्हारे)

 श्रीगोंदा आगाराच्या ताफ्यात नव्याने दाखल झालेल्या पाच राजमाता जिजाऊ एसटी बसेसचे विधिवत पूजन करून प्रवाशांच्या सेवेत लोकार्पण करण्यात आले. परिक्रमा इन्स्टिट्यूटच्या अध्यक्षा तथा मा.जिल्हा परिषद सदस्या डॉ. प्रतिभाताई बबनराव पाचपुते यांच्या हस्ते फीत कापून या नवीन बसेस प्रवाशांच्या सेवेत दाखल करण्यात आल्या.

श्रीगोंदा तालुक्यातील ग्रामीण भागातील नागरिकांसाठी एसटी बससेवा ही दैनंदिन जीवनातील अत्यंत महत्त्वाची वाहतूक व्यवस्था आहे. शिक्षण, नोकरी, व्यवसाय, शासकीय कामे तसेच विविध कारणांसाठी दररोज मोठ्या संख्येने नागरिक एसटी बससेवेचा वापर करतात. त्यामुळे श्रीगोंदा आगारात नव्या आणि अद्ययावत पाच बसेस दाखल झाल्याने प्रवाशांना मोठा दिलासा मिळणार आहे.

या नवीन बसेसमुळे तालुक्यातील नागरिक, शालेय व महाविद्यालयीन विद्यार्थी तसेच विशेषतः माता-भगिनींचा प्रवास अधिक सुरक्षित, सुखकर आणि आरामदायी होण्यास मदत होणार आहे. ग्रामीण भागातील प्रवाशांना दर्जेदार आणि सुरक्षित सार्वजनिक वाहतूक सेवा उपलब्ध करून देण्याच्या दृष्टीने या बसेसचे आगमन महत्त्वाचे मानले जात आहे.

लोकार्पण प्रसंगी डॉ. प्रतिभाताई पाचपुते यांनी नवीन बसेसच्या सेवेमुळे श्रीगोंदा आगाराच्या प्रवासी सेवेला अधिक बळ मिळेल, असा विश्वास व्यक्त केला. एसटी महामंडळाने प्रवाशांच्या गरजा लक्षात घेऊन अधिकाधिक आधुनिक व सुरक्षित बसेस उपलब्ध करून द्याव्यात, अशी अपेक्षाही यावेळी व्यक्त करण्यात आली.

यावेळी नगराध्यक्षा ,नगरसेवक, नगरसेविका,एसटी महामंडळाचे अधिकारी, कर्मचारी, आगारातील कर्मचारी, पदाधिकारी, नागरिक तसेच प्रवासी उपस्थित होते. नवीन बसेसच्या लोकार्पणामुळे उपस्थितांमध्ये उत्साहाचे वातावरण होते.

चौकट - श्रीगोंदा आगाराच्या ताफ्यात दाखल झालेल्या या पाच ‘राजमाता जिजाऊ’ बसेसमुळे प्रवाशांच्या सुरक्षित आणि आरामदायी प्रवासाला नवी दिशा मिळणार असून, एसटीचा प्रवास, सुरक्षित प्रवास! या भावनेला अधिक बळ मिळणार आहे.