संघर्षक्रांती वृत्तवेध - श्रीगोंदा 

दि. 20 ऑगस्ट 2026

(उज्वला उल्हारे)

 “आमदार विक्रम पाचपुते हे उत्कृष्ट वक्ते असून समाजातील प्रश्नांची त्यांना उत्तम जाण आहे. अभ्यासू, तरुण आणि गुणी कार्यकर्ता म्हणून महाराष्ट्राच्या राजकारणात मोठी भूमिका बजावण्याची क्षमता त्यांच्यात आहे. त्यामुळे श्रीगोंदकरांनी विक्रमला महाराष्ट्राच्या राजकारणासाठी ‘सुट्टी’ द्यावी,” असे थेट आवाहन भाजपा प्रदेशाध्यक्ष आमदार रवींद्र चव्हाण यांनी केले. त्यांच्या या वक्तव्यामुळे आमदार विक्रमदादा पाचपुते यांना आगामी काळात पक्षाकडून राज्यस्तरावर महत्त्वाची जबाबदारी मिळण्याच्या चर्चेला बळ मिळाले आहे.

आमदार विक्रम पाचपुते यांच्या निवासस्थानी आयोजित कार्यकर्त्यांच्या बैठकीत रवींद्र चव्हाण बोलत होते. प्रदेशाध्यक्षांच्या या स्पष्ट आणि सूचक वक्तव्याने बैठकीतील कार्यकर्त्यांमध्ये उत्साहाचे वातावरण निर्माण झाले. स्थानिक राजकारणात सक्रिय असलेल्या पाचपुते यांची भूमिका आता महाराष्ट्राच्या राजकारणाच्या व्यापक पटावर नेण्याचा पक्षाचा विचार असल्याचे संकेत या निमित्ताने मिळाले.

प्रदेशाध्यक्ष आ.रवींद्र चव्हाण म्हणाले,

विक्रम केवळ प्रश्न मांडत नाहीत, तर त्याचा पाठपुरावा करतात” विक्रम पाचपुते यांचे वय कमी असून ते अत्यंत तरुण आहेत. मोठ्या प्रमाणावर प्रवास करून जनतेशी थेट संपर्क साधण्याची क्षमता त्यांच्यात आहे. एखादा प्रश्न समोर आल्यानंतर तो केवळ मांडून थांबणे ही त्यांची कार्यपद्धती नाही. संबंधित प्रश्नाचा सातत्याने पाठपुरावा करून तो मार्गी लावण्यासाठी प्रयत्न करणे, ही त्यांची विशेष कार्यशैली आहे.

समाजातील विविध घटकांचे प्रश्न समजून घेऊन त्यावर प्रभावीपणे काम करण्याची क्षमता पाचपुते यांच्यात असल्याचेही चव्हाण यांनी अधोरेखित केले.

अभ्यास, वक्तृत्व आणि जनसंपर्काची सांगड

“विक्रम हा केवळ आमदार म्हणून नव्हे, तर एक अभ्यासू आणि प्रभावी कार्यकर्ता म्हणून पुढे येत आहे. त्यांच्या वक्तृत्वात मुद्दा आहे, अभ्यासात खोली आहे आणि प्रश्नांच्या पाठपुराव्यात सातत्य आहे. महाराष्ट्राला अशाच तरुण आणि सक्षम नेतृत्वाची गरज आहे,” अशा शब्दांत प्रदेशाध्यक्ष रवींद्र चव्हाण यांनी आमदार विक्रम पाचपुते यांच्या कार्यशैलीचे कौतुक केले.

पाचपुते यांच्या नेतृत्वगुणांचा राज्याच्या व्यापक राजकारणासाठी उपयोग व्हावा, अशी अपेक्षा व्यक्त करत चव्हाण यांनी श्रीगोंदकरांनाच भावनिक साद घातली. “श्रीगोंदकरांनो, विक्रमला महाराष्ट्रासाठी द्या. महाराष्ट्राच्या राजकारणासाठी त्यांना तुम्ही सुट्टी द्या,” या वक्तव्याने उपस्थित कार्यकर्त्यांमध्ये चांगलाच जोश निर्माण झाला.

भाजपा प्रदेशाध्यक्षांच्या या वक्तव्यामुळे आमदार विक्रम पाचपुते यांच्या नेतृत्वाची चर्चा आता श्रीगोंदा मतदारसंघापुरती मर्यादित न राहता राज्याच्या राजकारणातही सुरू झाली आहे. तरुण नेतृत्व, प्रभावी वक्तृत्व, अभ्यासू वृत्ती, व्यापक जनसंपर्क आणि जनतेच्या प्रश्नांचा सातत्यपूर्ण पाठपुरावा या गुणांच्या जोरावर पाचपुते यांना पक्षाकडून भविष्यात मोठी जबाबदारी मिळू शकते, अशी राजकीय चर्चा रंगू लागली आहे.

दरम्यान, प्रदेशाध्यक्ष रवींद्र चव्हाण यांच्या वक्तव्याकडे आगामी राजकीय घडामोडींच्या पार्श्वभूमीवर महत्त्वपूर्ण संकेत म्हणून पाहिले जात आहे. त्यामुळे आमदार विक्रम पाचपुते यांची पुढील राजकीय वाटचाल केवळ श्रीगोंद्यापुरती राहणार की महाराष्ट्राच्या राजकारणात त्यांना नवी भूमिका मिळणार, याकडे आता राजकीय वर्तुळाचे लक्ष लागले आहे.

चौकट :

“विक्रमला महाराष्ट्रासाठी द्या!” प्रदेशाध्यक्ष रवींद्र चव्हाण तरुण, अभ्यासू आणि प्रभावी नेतृत्व म्हणून आमदार विक्रम पाचपुते यांच्याकडे राज्याच्या राजकारणातील संभाव्य नेतृत्व म्हणून पाहिले जात असल्याचे संकेत भाजपा प्रदेशाध्यक्ष रवींद्र चव्हाण यांच्या वक्तव्याने मिळाले आहेत. प्रदेशाध्यक्षांच्या या आवाहनामुळे पाचपुते यांना आगामी काळात पक्षाकडून कोणती जबाबदारी मिळते, याबाबत उत्सुकता निर्माण झाली आहे.