संघर्षक्रांती वृत्तवेध - श्रीगोंदा 

दि. 31जुलै 2026

(उज्वला उल्हारे)

अल निनोच्या प्रभावामुळे यंदा परिसरात अपेक्षेपेक्षा कमी पर्जन्यवृष्टी झाल्याने सिना धरणातील पाणीसाठ्यात मोठी घट झाली होती. त्यामुळे धरणावर अवलंबून असलेल्या घोगरगाव, बनपिंप्री, थिटे सांगवी, चवरसांगवी, तरडगव्हाण, मांडवगण, रुईखेल, बांगर्डे, खांडगाव तसेच इतर गावांतील शेतकरी चिंतेत होते. पाण्याअभावी खरीप पिकांसह पिण्याच्या पाण्याचाही प्रश्न निर्माण होण्याची शक्यता असल्याने शेतकऱ्यांमध्ये हवालदिल वातावरण होते.

ही परिस्थिती लक्षात घेऊन श्रीगोंदा विधानसभा मतदारसंघाचे आमदार विक्रमदादा पाचपुते यांनी शेतकऱ्यांच्या हितासाठी सातत्याने पाठपुरावा करत महाराष्ट्र राज्याचे जलसंपदा मंत्री तथा अहिल्यानगर जिल्ह्याचे पालकमंत्री राधाकृष्ण विखे पाटील यांच्याकडे सिना धरणासाठी तातडीने पाणी उपलब्ध करून देण्याची मागणी केली होती.

या पाठपुराव्याची दखल घेत सध्या सुरू असलेल्या कुकडी कालव्याच्या रोटेशनमधून भोसा खिंडीतून सिना धरणात १५० क्युसेक वेगाने पाणी सोडण्याचा महत्त्वपूर्ण निर्णय घेण्यात आला. या निर्णयामुळे सिना धरणातील पाणीसाठ्यात वाढ होण्यास मदत होणार असून परिसरातील शेतकरी, नागरिक आणि जनावरांच्या पाण्याचा प्रश्न काही प्रमाणात मार्गी लागणार आहे.

या निर्णयामुळे घोगरगाव, बनपिंप्री ,थिटे सांगवी, चवरसांगवी, तरडगव्हाण, मांडवगण, रुईखेल, बांगर्डे, खांडगाव तसेच सिना धरणावर अवलंबून असलेल्या इतर गावांतील शेतकरी आणि नागरिकांनी समाधान व्यक्त केले आहे. पालकमंत्री राधाकृष्ण विखे पाटील यांचे मनःपूर्वक आभार मानत आमदार विक्रमदादा पाचपुते यांच्या सातत्यपूर्ण पाठपुराव्याचेही सर्व स्तरांतून कौतुक होत आहे.

या निर्णयामुळे सिना धरणावरील पाणीसाठ्यात वाढ होऊन शेती, पिण्याचे पाणी आणि परिसरातील जलव्यवस्थापनाला मोठा आधार मिळणार असल्याने शेतकऱ्यांनी शासन आणि लोकप्रतिनिधींच्या या सकारात्मक भूमिकेचे स्वागत केले आहे.

चौकट- याबाबत प्रतिक्रिया देताना आमदार विक्रमदादा पाचपुते म्हणाले, शेतकरी, नागरिक आणि परिसराच्या पाणीप्रश्नाची तीव्रता लक्षात घेऊन शासनाकडे सातत्याने पाठपुरावा केला. त्याला सकारात्मक प्रतिसाद मिळाल्याने भोसा खिंडीतून सिना धरणात पाणी सोडण्याचा निर्णय झाला आहे. हा निर्णय परिसरातील शेतकऱ्यांसाठी मोठा दिलासा देणारा असून भविष्यातही मतदारसंघातील पाणीप्रश्न कायमस्वरूपी मार्गी लावण्यासाठी शासनाकडे सातत्याने प्रयत्न सुरू राहतील.