संघर्षक्रांती वृत्तवेध - श्रीगोंदा 

दि. 2 ऑगस्ट 2026

(उज्वला उल्हारे)

जिल्हा परिषद प्राथमिक शाळा, श्रीगोंदा शुगर येथे साहित्यरत्न लोकशाहीर अण्णाभाऊ साठे यांच्या जयंतीनिमित्त तसेच लोकमान्य बाळ गंगाधर टिळक यांच्या पुण्यतिथीनिमित्त प्रेरणादायी कार्यक्रम उत्साहात संपन्न झाला. महापुरुषांच्या विचारांचे स्मरण करत विद्यार्थ्यांमध्ये सामाजिक जाणीव, राष्ट्रप्रेम आणि संस्कार रुजविण्याचा संदेश यावेळी देण्यात आला.

कार्यक्रमाच्या प्रारंभी लोकशाहीर अण्णाभाऊ साठे व लोकमान्य टिळक यांच्या प्रतिमेस पुष्पहार अर्पण करून विनम्र अभिवादन करण्यात आले. यानंतर बी. आर. आंबेडकर युवा प्रतिष्ठान, श्रीगोंदा फॅक्टरी यांच्या वतीने शाळेतील विद्यार्थ्यांना खाऊ वाटप करण्यात आले. या उपक्रमामुळे विद्यार्थ्यांमध्ये आनंदाचे वातावरण निर्माण झाले.

या प्रसंगी दत्तात्रय गायकवाड, राहुल छत्तिशे, ऋषिकेश बिटके, आकाश जावळे, सुभाष ससाणे यांच्यासह अनेक पालक उपस्थित होते. कार्यक्रम यशस्वी करण्यासाठी पाचांगणे मॅडम आणि पऱ्हे मॅडम यांनी विशेष परिश्रम घेतले.

महापुरुषांच्या विचारांचा वारसा जपत विद्यार्थ्यांमध्ये सामाजिक भान, संस्कार आणि राष्ट्रप्रेमाची भावना रुजविणारा हा कार्यक्रम प्रेरणादायी वातावरणात संपन्न झाला.

चौकट - यावेळी शाळेच्या मुख्याध्यापिका पद्मा शिर्के (पाचपुते) मॅडम यांनी विद्यार्थ्यांना मार्गदर्शन करत महापुरुषांचे विचार केवळ वाचनापुरते मर्यादित न ठेवता ते दैनंदिन जीवनात आचरणात आणण्याचे आवाहन केले. मनीषा गायकवाड मॅडम व नलिनी जरांडे मॅडम यांनी लोकशाहीर अण्णाभाऊ साठे आणि लोकमान्य टिळक यांच्या जीवनकार्याची, त्यागाची आणि समाजासाठीच्या योगदानाची माहिती विद्यार्थ्यांना सांगितली.

कार्यक्रमाचे प्रभावी सूत्रसंचालन संदीप हिरवे यांनी केले, तर उपस्थित मान्यवरांचे आभार सीमा खिळे मॅडम यांनी मानले.