संघर्षक्रांती वृत्तवेध - श्रीगोंदा 

दि. 5 ऑगस्ट 2026

(उज्वला उल्हारे)

श्री संत शिरोमणी सावता महाराज यांच्या ७३१ व्या संजीवन समाधी सोहळ्यानिमित्त होलेवाडी (लिंपणगाव) येथे अखंड हरिनाम सप्ताह, ग्रंथराज ज्ञानेश्वरी पारायण व गाथा भजन या धार्मिक कार्यक्रमांचे आयोजन करण्यात आले आहे.

हा सप्ताह आषाढ वद्य एकादशी, बुधवार दि. ५ ऑगस्ट २०२६ रोजी प्रारंभ होऊन आमावस्या, बुधवार दि. १२ ऑगस्ट २०२६ रोजी सांगता होणार आहे. या सप्ताहाचे आयोजन संत सावता माळी तरुण मंडळ, होलेवाडी यांच्या वतीने करण्यात आले असून प्रल्हाद महाराज होले हे नियोजक आहेत.

सप्ताहादरम्यान दररोज रात्री ७ ते ९ या वेळेत महाराष्ट्रातील नामवंत कीर्तनकारांची कीर्तनसेवा आयोजित करण्यात आली आहे. यामध्ये ह.भ.प. किरण महाराज गाडेकर (शास्त्री), ह.भ.प. पांडुरंग महाराज होले, ह.भ.प. प्रभू महाराज माळी, ह.भ.प. भागवताचार्य रामानंद महाराज जायभाय, ह.भ.प. रामायणाचार्य श्रीहरी महाराज देवढे, ह.भ.प. रामायणाचार्य सतिष महाराज खोमणे, ह.भ.प. महामंडलेश्वर कृष्ण महाराज नागे तसेच समारोपाच्या दिवशी सकाळी ९ ते ११ या वेळेत ह.भ.प. वैराग्यमूर्ती काका महाराज पहाणे (पंढरपूर) यांचे काल्याचे कीर्तन होणार आहे.

तसेच ११ ऑगस्ट रोजी सकाळी १० ते १२ या वेळेत ह.भ.प. वेदाचार्य हरी महाराज भोंदे (पिंपळगाव माळवी) यांचे विशेष कीर्तन आयोजित करण्यात आले आहे.

श्री संत सावता महाराज मंदिरास धर्म मंडप दिल्याबद्दल आमदार विक्रम दादा पाचपुते यांचे होलेवाडी ग्रामस्थांनी आभार मानले आहेत या कार्यक्रमासाठी जाहिरात सौजन्य महाकाल ॲक्सेसरीज यांचे असून सजावट सौजन्य श्रीराम फ्लावर डेकोरेटर्स यांनी केली आहे .

चौकट- या सप्ताहात दररोज हरिनाम, ज्ञानेश्वरी पारायण, गाथा भजन, कीर्तन आणि विविध धार्मिक कार्यक्रमांद्वारे भक्तिमय वातावरण निर्माण होणार असून परिसरातील भाविकांनी मोठ्या संख्येने उपस्थित राहून कार्यक्रमाचा लाभ घ्यावा, असे आवाहन आयोजक संत सावता माळी तरुण मंडळ, होलेवाडी यांच्या वतीने करण्यात आले आहे.