संघर्षक्रांती वृत्तवेध - श्रीगोंदा 

दि. 12 ऑगस्ट 2026

(उज्वला उल्हारे)

महाराष्ट्र राज्याचे संवेदनशील मुख्यमंत्री देवेंद्र फडवणीस यांच्या नेतृत्वाखाली अन्न व औषध प्रशासनाने (FDA) अनालॉग पनीरवर संपूर्ण महाराष्ट्रात एक वर्षासाठी बंदी घालण्याचा महत्त्वपूर्ण निर्णय घेतला आहे. या निर्णयाचे स्वागत करत श्रीगोंदा विधानसभा मतदारसंघाचे आमदार ॲड . विक्रमदादा  बबनरावजी पाचपुते यांनी मुख्यमंत्री देवेंद्रजी फडणवीस तसेच अन्न व औषध प्रशासनाचे महाराष्ट्रातील सर्व ग्राहक आणि दूध उत्पादक शेतकऱ्यांच्या वतीने आभार मानत अभिनंदन केले.

आजच्या काळात नागरिकांच्या आरोग्याशी संबंधित अन्नपदार्थांच्या गुणवत्तेचा प्रश्न अत्यंत महत्त्वाचा बनला आहे. पनीरसारख्या मोठ्या प्रमाणावर वापरल्या जाणाऱ्या खाद्यपदार्थामध्ये भेसळ किंवा दर्जाहीन पर्यायी पदार्थांचा वापर होऊ नये, यासाठी शासनाने घेतलेला हा निर्णय ग्राहकांच्या आरोग्याच्या दृष्टीने महत्त्वपूर्ण असल्याचे आमदार पाचपुते यांनी म्हटले आहे.

ग्राहकांच्या आरोग्याला सर्वोच्च प्राधान्य

दूध व दुग्धजन्य पदार्थांचा वापर सर्वसामान्य नागरिकांच्या दैनंदिन आहाराचा महत्त्वाचा भाग आहे. त्यामुळे अशा पदार्थांची गुणवत्ता आणि सुरक्षितता याबाबत कोणतीही तडजोड होऊ नये, अशी अपेक्षा नागरिकांकडून केली जाते. शासनाने अनालॉग पनीरच्या उत्पादन, विक्री व वापरावर एक वर्षासाठी बंदी आणल्याने ग्राहकांना सुरक्षित व दर्जेदार पनीर उपलब्ध होण्यास मदत होईल, असा विश्वास आमदार पाचपुते यांनी व्यक्त केला.

दूध उत्पादक शेतकऱ्यांनाही मिळणार फायदा

दूध उत्पादक शेतकऱ्यांच्या हिताचाही या निर्णयाशी थेट संबंध आहे. शेतकरी मोठ्या मेहनतीने दूध उत्पादन करतो; मात्र बाजारात दुधाला पर्याय म्हणून कृत्रिम किंवा अनालॉग पदार्थांचा वापर वाढल्यास त्याचा परिणाम नैसर्गिक दूध व दुग्धजन्य पदार्थांच्या बाजारपेठेवर होऊ शकतो. त्यामुळे दर्जेदार व अस्सल दुग्धजन्य पदार्थांना प्रोत्साहन मिळणे हे दूध उत्पादक शेतकऱ्यांच्या दृष्टीनेही सकारात्मक पाऊल आहे.

शासनाच्या या निर्णयामुळे ग्राहकांचे आरोग्य, अन्नपदार्थांची गुणवत्ता आणि दूध उत्पादक शेतकऱ्यांचे हित या तिन्ही बाबींना महत्त्व मिळाले आहे, असे आमदार पाचपुते यांनी नमूद केले.