संघर्षक्रांती वृत्तवेध - श्रीगोंदा 

दि. 13 ऑगस्ट 2026

(उज्वला उल्हारे)

 श्रीगोंदा- अहिल्यानगर विधानसभा मतदारसंघातील नागरिकांच्या विविध समस्या, अडचणी आणि प्रलंबित प्रश्न सोडविण्यासाठी आमदार विक्रमदादा पाचपुते यांच्या पुढाकाराने शुक्रवार, दि. १४ ऑगस्ट २०२६ रोजी भव्य जनता दरबाराचे आयोजन करण्यात आले आहे. नागरिकांच्या समस्या थेट ऐकून त्यावर तातडीने मार्ग काढण्यासाठी हा जनता दरबार आयोजित करण्यात आला असून, मतदारसंघातील नागरिकांनी मोठ्या संख्येने उपस्थित राहून आपल्या समस्या मांडाव्यात, असे आवाहन आमदार विक्रमदादा पाचपुते यांनी केले आहे.

“आपली समस्या, आमदारांची जबाबदारी!” या भूमिकेतून आयोजित करण्यात आलेल्या या जनता दरबारात नागरिकांना विविध शासकीय विभागांशी संबंधित प्रश्न थेट मांडता येणार आहेत. प्रशासनाच्या माध्यमातून प्रलंबित कामांना गती देणे, नागरिकांच्या अडचणी जाणून घेणे आणि संबंधित अधिकाऱ्यांशी समन्वय साधून प्रश्न मार्गी लावणे, हा जनता दरबाराचा प्रमुख उद्देश आहे.

श्रीगोंदा - अहिल्यानगर विधानसभा मतदारसंघातील अहिल्यानगर तालुक्यातील नागरिकांच्या समस्या सोडविण्यासाठी हा उपक्रम महत्त्वपूर्ण ठरणार आहे. नागरिकांना आपल्या प्रश्नांसाठी थेट लोकप्रतिनिधींशी संवाद साधण्याची संधी मिळणार असल्याने जनता दरबाराकडे नागरिकांचे लक्ष लागले आहे.

हा जनता दरबार शुक्रवार, दि. १४ ऑगस्ट २०२६ रोजी सकाळी १० ते दुपारी ३ वाजेपर्यंत, जिल्हा सैनिक कल्याण कार्यालय, RTO कार्यालयाजवळ, नगर कॉलेजसमोर, अहिल्यानगर येथे आयोजित करण्यात आला आहे.

मतदारसंघातील नागरिकांनी आपल्या समस्या, निवेदने व आवश्यक कागदपत्रांसह जनता दरबारात उपस्थित राहून या संधीचा लाभ घ्यावा, असे आवाहन आमदार विक्रमदादा पाचपुते यांच्या वतीने करण्यात आले आहे.