संघर्षक्रांती वृत्तवेध - श्रीगोंदा 

दि. 15 ऑगस्ट 2026

(उज्वला उल्हारे)

श्रीगोंदा विधानसभा मतदारसंघाचे लोकप्रिय व कार्यक्षम आमदार विक्रमदादा बबनराव पाचपुते यांच्या पुढाकारातून अहिल्यानगर येथे आयोजित करण्यात आलेल्या जनता दरबाराला नागरिकांचा उत्स्फूर्त प्रतिसाद मिळाला. जिल्हा सैनिक कल्याण कार्यालय, अहिल्यानगर येथे झालेल्या या जनता दरबारात अहिल्यानगर तालुक्यासह परिसरातील नागरिकांनी मोठ्या संख्येने उपस्थित राहून आपल्या विविध अडचणी, समस्या आणि प्रलंबित प्रश्न आमदार विक्रमदादा पाचपुते यांच्यासमोर थेट मांडले.

जनता दरबाराचे उत्कृष्ट नियोजन, शिस्तबद्ध व्यवस्था आणि विविध विभागांच्या अधिकाऱ्यांची तत्पर उपस्थिती यामुळे नागरिकांमध्ये समाधानाचे वातावरण पाहायला मिळाले. नागरिकांच्या प्रश्नांवर केवळ चर्चा न करता संबंधित विभागाच्या अधिकाऱ्यांशी थेट समन्वय साधत प्रश्न मार्गी लावण्यासाठी आवश्यक सूचना देण्यात आल्या. या जनता दरबारात किमान २०० अर्जांवर कार्यवाही करण्यात आली, तर नागरिकांकडून असंख्य निवेदनेही स्वीकारण्यात आली.

महसूल विभागाशी संबंधित प्रकरणे, वीजपुरवठा व विद्युत जोडणीचे प्रश्न, पाणीपुरवठा, रस्ते, शासकीय योजना, विविध प्रमाणपत्रे, स्थानिक विकासकामे तसेच अन्य नागरी समस्यांबाबत नागरिकांनी आमदार पाचपुते यांच्याकडे आपली गाऱ्हाणी मांडली. प्रत्येक प्रश्नाची गांभीर्याने दखल घेत संबंधित अधिकारी व विभागाशी चर्चा करून आवश्यक ती कार्यवाही करण्याच्या सूचना देण्यात आल्या.

प्रश्न ऐकून घेण्यापेक्षा त्यावर कार्यवाहीला प्राधान्य-  नागरिकांचे प्रश्न केवळ ऐकून घेणे पुरेसे नाही, तर ते योग्य पातळीवर मांडून त्यावर ठोस कार्यवाही करणे ही लोकप्रतिनिधी म्हणून आपली जबाबदारी आहे, या भावनेतून आमदार विक्रमदादा पाचपुते यांनी नागरिकांशी थेट संवाद साधला. विविध विभागांचे अधिकारी उपस्थित असल्याने अनेक प्रश्नांवर जागेवरच चर्चा करून पुढील कार्यवाहीचा मार्ग स्पष्ट करण्यात आला.

जनता दरबाराच्या माध्यमातून नागरिक आणि प्रशासन यांच्यातील दुवा अधिक मजबूत होत असल्याचे यावेळी दिसून आले. आपल्या समस्या घेऊन आलेल्या नागरिकांना संबंधित अधिकाऱ्यांशी समन्वय साधून मार्गदर्शन मिळाल्याने नागरिकांनी समाधान व्यक्त केले.

कार्यकर्त्यांची सत्कारासाठीही मोठी गर्दी :-जनता दरबाराला नागरिकांचा प्रतिसाद मिळतानाच आमदार विक्रमदादा पाचपुते यांच्या सत्कारासाठी कार्यकर्त्यांमध्येही मोठा उत्साह पाहायला मिळाला. विविध भागांतून आलेल्या कार्यकर्त्यांनी आमदार पाचपुते यांचा सत्कार करून शुभेच्छा दिल्या. त्यामुळे कार्यक्रमस्थळी दिवसभर उत्साहाचे वातावरण निर्माण झाले होते.

जनतेच्या अडचणी समजून घेणे, त्या सोडविण्यासाठी प्रशासनाशी सातत्याने पाठपुरावा करणे आणि नागरिकांच्या विश्वासाला न्याय देणे, या उद्देशाने जनता दरबाराची ही थेट जनसंवादाची परंपरा पुढेही सुरू ठेवण्याचा निर्धार यावेळी व्यक्त करण्यात आला.

जनतेच्या प्रश्नांसाठी सदैव तत्पर...जनतेच्या सेवेसाठी सदैव कटिबद्ध! या भूमिकेतून आमदार विक्रमदादा पाचपुते यांचा जनता दरबार नागरिकांसाठी प्रभावी व्यासपीठ ठरत असल्याचे या निमित्ताने अधोरेखित झाले.