संघर्षक्रांती वृत्तवेध - श्रीगोंदा 

दि. 16 ऑगस्ट 2026

(उज्वला उल्हारे)

इलायची, सौफ अथवा तत्सम उत्पादनांच्या नावाखाली जाहिराती करून प्रत्यक्षात फ्लेवर्ड सुपारी, तंबाखू, पान मसाला व गुटख्यासारख्या उत्पादनांच्या ब्रँडचा अप्रत्यक्ष प्रचार करणाऱ्या जाहिरातींविरोधात श्रीगोंदा विधानसभा मतदारसंघाचे आमदार विक्रमदादा पाचपुते यांनी ४ जुलै २०२५ रोजी महाराष्ट्र विधानसभेत ठामपणे आवाज उठवला होता. अशा दिशाभूल करणाऱ्या जाहिरातींमध्ये सहभागी होणाऱ्या अभिनेते व सेलिब्रिटींचीही जबाबदारी निश्चित करून त्यांच्यावर कारवाई करावी, अशी स्पष्ट मागणी त्यांनी शासनाकडे केली होती.

या मागणीचा सातत्याने पाठपुरावा केल्यानंतर अखेर या विषयावर प्रत्यक्ष कारवाईला सुरुवात झाली आहे. अन्न व औषध प्रशासनाचे आयुक्त तुकाराम मुंढे यांनी अशा जाहिरातींमध्ये सहभागी असलेल्या संबंधित अभिनेत्यांना कारणे दाखवा नोटीस बजावली आहे. त्यामुळे आमदार विक्रम पाचपुते यांनी विधानसभेत उपस्थित केलेल्या प्रश्नाला आणि त्यानंतर केलेल्या सातत्यपूर्ण पाठपुराव्याला यश मिळाले आहे.

तंबाखू, गुटखा, पान मसाला व आरोग्यास घातक उत्पादनांवर निर्बंध असताना त्याच ब्रँडच्या नावाने इलायची, सौफ किंवा अन्य उत्पादनांची जाहिरात करून ब्रँडचा अप्रत्यक्ष प्रचार करण्याचा प्रकार सर्रासपणे केला जातो. लोकप्रिय अभिनेते आणि सेलिब्रिटींच्या माध्यमातून होणाऱ्या या जाहिरातींचा प्रभाव विशेषतः तरुण पिढीवर पडण्याची शक्यता असल्याने हा केवळ जाहिरातींचा विषय नसून सार्वजनिक आरोग्याशी संबंधित गंभीर प्रश्न असल्याची भूमिका आमदार पाचपुते यांनी मांडली होती.

“जाहिरात इलायचीची किंवा सौफची असली, तरी त्यामागे जर तंबाखू, पान मसाला किंवा गुटख्याच्या ब्रँडची प्रसिद्धी होत असेल, तर केवळ उत्पादनाचे नाव बदलून सामाजिक जबाबदारीपासून पळ काढता येणार नाही. मोठ्या सेलिब्रिटींच्या प्रसिद्धीचा प्रभाव लाखो तरुणांवर पडतो. त्यामुळे अशा जाहिराती स्वीकारताना त्यांचीही जबाबदारी निश्चित झाली पाहिजे,” असे आमदार विक्रम पाचपुते यांनी स्पष्ट केले.

या विषयावर परिणाम दिसण्यासाठी जवळपास एक वर्षाचा कालावधी लागला असला तरी सातत्याने केलेला पाठपुरावा अखेर फलदायी ठरला आहे. FDA आयुक्त तुकाराम मुंढे यांनी उचललेले हे पाऊल स्वागतार्ह असून कारणे दाखवा नोटीस ही पुढील कारवाईची महत्त्वपूर्ण सुरुवात आहे. संबंधित प्रकरणांमध्ये कायद्याच्या तरतुदींनुसार योग्य ती ठोस कारवाई करण्यात यावी आणि अशा दिशाभूल करणाऱ्या जाहिरातींना प्रभावी आळा बसावा, अशी अपेक्षा आमदार पाचपुते यांनी व्यक्त केली.

चौकट- विधानसभेत प्रश्न मांडणे ही केवळ सुरुवात असते. त्या प्रश्नाचा सातत्याने पाठपुरावा करून प्रत्यक्ष निर्णय आणि कारवाईपर्यंत नेणे महत्त्वाचे असते. ४ जुलै २०२५ रोजी मांडलेल्या मागणीवर आज कारवाई सुरू झाली, याचे समाधान आहे. एक वर्ष लागले, पण पाठपुराव्याला यश आले. जनहिताचा विषय असेल तर तो अंतिम परिणाम मिळेपर्यंत सोडायचा नाही, हीच माझी भूमिका आहे, असे आमदार विक्रम दादा पाचपुते यांनी सांगितले.

एक वर्षाचा पाठपुरावा  आता प्रत्यक्ष कारवाई :-४ जुलै २०२५ महाराष्ट्र विधानसभेत दिशाभूल करणाऱ्या जाहिरातींचा मुद्दा उपस्थित मागणी अशा जाहिराती करणाऱ्या अभिनेते व सेलिब्रिटींची जबाबदारी निश्चित करून कारवाई करावी सातत्यपूर्ण पाठपुरावा  शासन व संबंधित यंत्रणांकडे विषयाचा सातत्याने पाठपुरावा १६ ऑगस्ट २०२६  FDA आयुक्त तुकाराम मुंढे यांच्याकडून संबंधित अभिनेत्यांना कारणे दाखवा नोटीस

“उशीर झाला, पण पाठपुरावा थांबला नाही  आणि अखेर जनहिताच्या लढ्याला यश मिळाले.”

 विक्रमदादा पाचपुते आमदार, श्रीगोंदा विधानसभा मतदारसंघ