संघर्षक्रांती वृत्तवेध - श्रीगोंदा 

दि. 16 ऑगस्ट 2026

(उज्वला उल्हारे)

तांदळी दुमाला ग्रामपंचायतीच्या वतीने १५ ऑगस्ट स्वातंत्र्यदिनानिमित्त ध्वजारोहणाचा कार्यक्रम अनोख्या आणि प्रेरणादायी पद्धतीने पार पडला. गावचे लोकनियुक्त सरपंच संजय निगडे अण्णा यांच्या संकल्पनेतून तांदळेश्वर माध्यमिक विद्यालयातील मार्च २०२६ च्या एसएससी परीक्षेत प्रथम तीन क्रमांक मिळविणाऱ्या गुणवंत विद्यार्थिनींच्या हस्ते ग्रामपंचायत कार्यालयात ध्वजारोहण करण्यात आले.

युवा पिढी ही देशाचे भविष्य असल्याने विद्यार्थ्यांच्या मनात देशप्रेम, राष्ट्रभक्ती आणि राष्ट्रीय कर्तव्याची भावना जागृत व्हावी, या उद्देशाने हा उपक्रम राबविण्यात आला. सलग दोन वर्षांपासून तांदळेश्वर माध्यमिक विद्यालयातील मुलींनी गुणवत्तेत आघाडी घेतली असून, यंदाही गुणवंत विद्यार्थिनींच्या हस्ते राष्ट्रध्वज फडकावून त्यांच्या कर्तृत्वाचा सन्मान करण्यात आला.

एसएससी परीक्षेत प्रथम तीन क्रमांक मिळविणाऱ्या विद्यार्थिनींमध्ये कु. शेळके सृष्टी मारुती - ९१ टक्के, कु. शेळके तेजश्री प्रकाश  -८९.६० टक्के आणि कु. नाळे वेदिका संतोष . ८९.४० टक्के यांचा समावेश आहे. त्यांच्या हस्ते ध्वजारोहण होताच उपस्थितांनी टाळ्यांच्या कडकडाटात गुणवंत विद्यार्थिनींचे अभिनंदन केले.

ध्वजारोहण कार्यक्रमास लोकनियुक्त सरपंच, उपसरपंच, ग्रामपंचायतीचे सर्व सदस्य, ग्रामपंचायत अधिकारी, गावातील पदाधिकारी, ग्रामस्थ तसेच माता-भगिनी मोठ्या संख्येने उपस्थित होत्या. राष्ट्रध्वजाला मानवंदना देत देशभक्तीपूर्ण वातावरणात कार्यक्रम पार पडला.

गुणवंत विद्यार्थिनींच्या हस्ते ध्वजारोहण करण्याची ही संकल्पना केवळ सन्मानापुरती मर्यादित न राहता गावातील इतर विद्यार्थ्यांनाही मेहनत, गुणवत्ता आणि राष्ट्रप्रेमाची प्रेरणा देणारी ठरली. शिक्षणात यश मिळविणाऱ्या विद्यार्थ्यांना राष्ट्रीय पर्वाशी जोडून त्यांचा गौरव करण्याचा हा उपक्रम ग्रामस्थांच्या कौतुकाचा विषय ठरला.

युवा पिढीच्या मनात देशप्रेमाची ज्योत अधिक प्रज्वलित व्हावी आणि गुणवत्तेचा आदर्श समोर यावा, या उद्देशाने राबविण्यात आलेल्या या उपक्रमातून ‘गुणवत्ता, देशप्रेम आणि सामाजिक बांधिलकी’ यांचा सुंदर संगम पाहायला मिळाला.

या वेगळ्या उपक्रमामुळे तांदळी दुमाला येथील स्वातंत्र्यदिन सोहळा विशेष ठरला. ग्रामपंचायतीच्या या संकल्पनेचे ग्रामस्थांनी स्वागत करून गुणवंत विद्यार्थिनींचे अभिनंदन केले.

देशप्रेम, शिक्षण, गुणवत्ता आणि सामाजिक बांधिलकीचा संदेश देत तांदळी दुमाला ग्रामपंचायतीचा स्वातंत्र्यदिन सोहळा उत्साहात संपन्न झाला.

चौकट - सरपंच संजय निगडे अण्णा यांच्या कार्यपद्धतीत दूरदृष्टी, कर्तव्यदक्षता, समन्वय आणि योग्य धोरणाला विशेष महत्त्व आहे. तळागाळातील घटकांना सोबत घेऊन गावाचा कारभार करणे आणि विकासाच्या प्रक्रियेत प्रत्येक घटकाला सहभागी करून घेणे, ही त्यांच्या कार्यशैलीची वैशिष्ट्ये मानली जातात.

गाव आदर्श गाव म्हणून पुढे राहावे, विविध शासकीय योजनांमध्ये अग्रेसर राहावे आणि गावाच्या सर्वांगीण विकासाला चालना मिळावी, यासाठी ग्रामपंचायतीच्या माध्यमातून सातत्याने नियोजन आणि प्रयत्न केले जात आहेत. त्यामुळे तांदळी दुमाला गावाने विविध उपक्रमांमधून आपली वेगळी ओळख निर्माण केली आहे.