संघर्षक्रांती वृत्तवेध - श्रीगोंदा 

दि. 18 ऑगस्ट 2026

(उज्वला उल्हारे)

 करमाळा येथील श्री कमलादेवी मंदिराच्या जतन व संवर्धनाच्या पवित्र कार्यासाठी करमाळा येथील  संदेश कमल शिवाजी खुळे यांनी ५ हजार १ रुपयांची देणगी श्री कमलादेवीच्या चरणी अर्पण केली. त्यांच्या या योगदानातून मंदिराच्या जतन व संवर्धनाच्या कार्याला मोलाची साथ मिळाली आहे.

श्री कमलादेवी मंदिर जतन व संवर्धनासाठी सुरू असलेल्या या कार्याच्या निमित्ताने मंदिर समितीच्या वतीने संदेश खुळे यांचा सत्कार करण्यात आला. यावेळी मंदिराचे पुजारी नारायण सोरटे, व्यवस्थापक अशोक गाठे, रघुनाथ खटके, लक्ष्मण हवलदार यांच्यासह खुळे परिवार, मानकरी, सेवेकरी व भाविक भक्त उपस्थित होते.

करमाळा येथील श्री कमलादेवी मंदिराला प्राचीन दगडी वास्तूचा ऐतिहासिक व धार्मिक वारसा लाभलेला आहे. या पुरातन मंदिराचे मूळ दगडी स्वरूप जतन करून त्याचे संवर्धन करण्याचे काम श्री जगदंबा कमलादेवी देवस्थान ट्रस्टच्या पुढाकाराने गेल्या वर्षापासून सुरू आहे. मंदिर जतन व संवर्धनाचे काम सध्या प्रगतीपथावर असून, भाविकांनी दिलेल्या देणगी व सहकार्याच्या माध्यमातून या पवित्र कार्याला मोठी चालना मिळत आहे.

मंदिराचे पुरातन वैभव, दगडी बांधकाम आणि ऐतिहासिक स्वरूप भावी पिढ्यांसाठी जतन व्हावे, तसेच भाविक भक्तांना श्री कमलादेवीच्या मूळ मंदिराचे दर्शन घेता यावे, यासाठी सुरू असलेल्या या कार्यात अधिकाधिक भाविकांनी सहभागी व्हावे, असे आवाहन श्री जगदंबा कमलादेवी देवस्थान ट्रस्ट, करमाळा यांच्या वतीने करण्यात आले आहे.

मंदिराच्या जतन व संवर्धनासाठी भाविकांनी सढळ हाताने देणगी देऊन या धार्मिक व ऐतिहासिक कार्यात आपले योगदान द्यावे, असे आवाहनही ट्रस्टच्या वतीने करण्यात आले आहे. भाविकांसाठी ऑनलाईन देणगीची सुविधाही उपलब्ध करून देण्यात आली आहे.

देणगीसाठी संपर्क :

अशोक गाठे, व्यवस्थापक

मो. ९४०४७०८९२४ / ९५७९९६१७७४

चौकट :

“पुरातन श्री कमलादेवी मंदिराचे वैभव जतन करण्यासाठी प्रत्येक भाविकाचा हातभार महत्त्वाचा; देणगीच्या माध्यमातून या ऐतिहासिक कार्यात सहभागी व्हा!”