संघर्षक्रांती वृत्तवेध - श्रीगोंदा 

दि. 15 ऑगस्ट 2026

(उज्वला उल्हारे)

सुप्रसिद्ध रिल स्टार विराज औचीते यांनी आपला वाढदिवस अनाथ, निराधार व वंचित बालकांसोबत साजरा करून सामाजिक बांधिलकीचे प्रेरणादायी उदाहरण घालून दिले. तपोवन रोड येथील रुद्रपूजा फाउंडेशन संचलित बालघर प्रकल्पात त्यांच्या वाढदिवसानिमित्त विशेष कार्यक्रमाचे आयोजन करण्यात आले होते. यावेळी बालघर प्रकल्पातील बालकांसोबत वाढदिवसाचा आनंद द्विगुणित करत विराज औचीते यांनी त्यांच्याशी मनमोकळा संवाद साधला.

वाढदिवसानिमित्त बालघर प्रकल्पातील बालकांना मिष्ठान्न भोजन, शालेय साहित्य तसेच क्रीडा साहित्याचे वाटप करण्यात आले. या उपक्रमामुळे बालकांच्या चेहऱ्यावर आनंद फुलला. वाढदिवसाच्या निमित्ताने केवळ औपचारिक कार्यक्रम न करता गरजू व वंचित बालकांच्या जीवनात आनंदाचा क्षण निर्माण करण्याचा प्रयत्न विराज औचीते यांनी केला.

कार्यक्रमादरम्यान बालकांनी उत्स्फूर्तपणे सहभाग घेतला. वाढदिवसाचा आनंद त्यांच्यासोबत वाटून घेताना विराज औचीते यांनी बालकांशी संवाद साधत त्यांच्या शिक्षणाबाबत, आवडी-निवडींबाबत तसेच भविष्यातील स्वप्नांबाबतही माहिती घेतली. बालकांच्या चेहऱ्यावर उमटलेला आनंद, उत्साह आणि समाधान पाहून उपस्थितांचे मनही भारावून गेले.

आजच्या धावपळीच्या जीवनात वाढदिवस म्हटले की मोठ्या पार्ट्या, केक आणि दिखाऊपणाला प्राधान्य दिले जाते. मात्र, विराज औचीते यांनी आपल्या वाढदिवसाचा आनंद समाजातील गरजू घटकांसोबत वाटून घेत सामाजिक संवेदनशीलतेचा आदर्श निर्माण केला. त्यांच्या या उपक्रमातून वाढदिवस साजरा करण्याची एक वेगळी आणि सकारात्मक दिशा समाजासमोर आली आहे.

“वाढदिवसाचा खरा आनंद केक कापण्यात नाही, तर एखाद्याच्या चेहऱ्यावर आनंद फुलवण्यात आहे,” हा संदेश या उपक्रमातून प्रभावीपणे अधोरेखित झाला. समाजातील गरजू बालकांच्या चेहऱ्यावर हास्य फुलवण्यासाठी आणि त्यांच्या शिक्षणासह सर्वांगीण विकासाला हातभार लावण्यासाठी अशा सामाजिक उपक्रमांची गरज असल्याचे उपस्थितांनी यावेळी व्यक्त केले.

बालघर प्रकल्पात सुरू असलेल्या सामाजिक कार्याचेही यावेळी कौतुक करण्यात आले. अनाथ, निराधार आणि वंचित बालकांना आधार देत त्यांच्या शिक्षण, संगोपन आणि भविष्यासाठी कार्य करणाऱ्या संस्थांना समाजातील दानशूर व्यक्ती, सामाजिक कार्यकर्ते आणि नागरिकांनी सहकार्य करण्याची गरज असल्याचे मत यावेळी व्यक्त करण्यात आले.

चौकट- वाढदिवसाला सामाजिकतेची जोड!

विराज औचीते यांनी बालघर प्रकल्पातील बालकांसोबत वाढदिवस साजरा करून समाजाप्रती असलेली आपली बांधिलकी अधोरेखित केली. मिष्ठान्न भोजनासोबत शालेय व क्रीडा साहित्याचे वाटप करत त्यांनी बालकांच्या आनंदात आपला आनंद शोधला.