संघर्षक्रांती वृत्तवेध - श्रीगोंदा 

दि.9 फेब्रुवारी 2026

(उज्वला उल्हारे)

मुख्यमंत्री देवेंद्र फडणवीस यांच्या हस्ते  ओझर विमानतळ नवीन एकात्मिक टर्मिनल इमारत बांधकाम व विस्तारीकरणाचे भूमीपूजन पार पडले.

मुख्यमंत्री देवेंद्र फडणवीस यावेळी म्हणाले की, नाशिक आणि त्र्यंबकेश्वर या दोन्ही शहरांना पौराणिक व आध्यात्मिक वारसा लाभला आहे. यापूर्वी झालेल्या कुंभमेळ्याच्या तुलनेत आगामी नाशिक - त्र्यंबकेश्वर सिंहस्थ कुंभमेळ्याला आठ ते दहापट भाविक येणार असल्याचा अंदाज आहे. या भाविकांना अधिक चांगल्या सुविधा उपलब्ध करून देण्यासाठी ओझर विमानतळाचे विस्तारीकरण करण्यात येत असून, याद्वारे विमानतळाच्या प्रवासी क्षमतेत मोठ्या प्रमाणात वाढ होणार आहे. तसेच, नाशिक जिल्हा कृषी क्षेत्रात आघाडीवर असल्याने या विस्तारीकरणामुळे निर्यात, उद्योग आणि औद्योगिकीकरणाला चालना मिळेल. यासह नाशिक जिल्ह्याचा विकासही भरारी घेईल.

दावोसच्या माध्यमातून नाशिकसाठी ₹13,000 कोटींची गुंतवणूक येणार असून, याद्वारे मोठ्या प्रमाणात रोजगारनिर्मिती होईल. ऑटोमोबाईल क्षेत्रात देशातील प्रमुख शहरांपैकी एक म्हणून नाशिकची ओळख अधिक ठळक होत असल्याचे मुख्यमंत्री फडणवीस यांनी यावेळी सांगितले.

आगामी सिंहस्थ कुंभमेळ्याच्या पार्श्वभूमीवर नाशिक जिल्ह्यात कोट्यवधींची विकासकामे हाती घेतली जाणार आहेत. तर, गोदावरी नदी निर्मल राहावी यासाठी आवश्यक त्या उपाययोजना राबवण्यात येत असून, नाशिक रिंग रोड जिल्ह्याच्या विकासाचे ग्रोथ इंजिन ठरेल, असे मुख्यमंत्री फडणवीस म्हणाले. 

यावेळी मंत्री गिरीष महाजन, मंत्री नरहरी झिरवाळ, मंत्री शिवेंद्रसिंहराजे भोसले, व इतर मान्यवर उपस्थित होते.