संघर्षक्रांती वृत्तवेध - श्रीगोंदा 

दि. 3 मार्च 2026

(उज्वला उल्हारे)

शासनाच्या निर्देशानुसार राज्यभर राबविण्यात येणाऱ्या छत्रपती शिवाजी महाराज महसूल समाधान शिबिर अभियान टप्पा - १ अंतर्गत श्रीगोंदा तालुक्यात ७ मार्च ते १३ मे २०२६ या कालावधीत मंडळस्तरावर एकदिवसीय शिबिरांचे आयोजन करण्यात आले आहे. तालुक्यातील नागरिकांनी या शिबिरांचा जास्तीत जास्त लाभ घ्यावा, असे आवाहन तहसीलदार सचिन डोंगरे यांनी केले आहे.

सर्वसामान्य नागरिक, शेतकरी, विद्यार्थी तसेच महिलांचे महसूल विभागाशी संबंधित दैनंदिन प्रश्न तत्काळ निकाली काढणे, तक्रारींचा सत्वर निपटारा करणे आणि महसूल प्रशासन अधिक लोकाभिमुख, कार्यक्षम व गतिमान करणे हा या अभियानाचा मुख्य उद्देश आहे.तालुक्यातील विविध मंडळांसाठी पुढीलप्रमाणे शिबिरे आयोजित करण्यात आली आहेत :

दि. ७ मार्च २०२६ रोजी काष्टी मंडळासाठी राजयोग मंगल कार्यालय (काष्टी),

दि. १६ मार्च रोजी चिंभळा मंडळासाठी श्री हंगेश्वर मंदिर (हंगेवाडी),

दि. २० मार्च रोजी पेडगाव मंडळासाठी दत्त मंदिर सभागृह (पेडगाव),

दि. २७ मार्च रोजी आढळगाव मंडळासाठी श्री सिद्धेश्वर देवस्थान (आढळगाव),

दि. २ एप्रिल रोजी बेलवंडी बु. मंडळासाठी श्री छत्रपती विद्यालय हॉल (बेलवंडी बु.),

दि. १० एप्रिल रोजी देवदैठण मंडळासाठी महादेव मंदिर (देवदैठण),

दि. १७ एप्रिल रोजी लोणी व्यंकनाथ मंडळासाठी जिजाई मंगल कार्यालय (लोणी व्यंकनाथ),

दि. २१ एप्रिल रोजी मांडवगण मंडळासाठी श्री संत सावतामाळी मंदिर सभागृह (मांडवगण),

दि. २३ एप्रिल रोजी भानगाव मंडळासाठी श्री भानेश्वर (महादेव) मंदिर (भानगाव),

दि. ८ मे २०२६ रोजी श्रीगोंदा मंडळासाठी तुळशीदास मंगल कार्यालय (श्रीगोंदा) आणि

दि. १३ मे २०२६ रोजी कोळगाव मंडळासाठी सैनिक सांस्कृतिक भवन (वीर भवन), कोळगाव येथे शिबिरे पार पडतील.

या शिबिरांमध्ये विविध शासकीय योजनांबाबत मार्गदर्शन, अर्ज स्वीकृती, तक्रारींचे निवारण तसेच प्रलंबित प्रकरणांवर तातडीने कार्यवाही करण्यात येणार आहे. नागरिकांनी संबंधित कागदपत्रांसह शिबिरांना उपस्थित राहावे, असे प्रशासनाकडून कळविण्यात आले आहे.

अधिक माहितीसाठी ग्राम महसूल अधिकारी, मंडळ अधिकारी किंवा तहसील कार्यालय, श्रीगोंदा येथे संपर्क साधावा, असेही आवाहन करण्यात आले आहे.