संघर्षक्रांती वृत्तवेध - श्रीगोंदा 

दि. 4 मार्च 2026

(उज्वला उल्हारे)

श्रीगोंदा : शिवाजीनगर परिसरात वाढती वर्दळ, बाहेरून येणाऱ्या तरुणांची संख्या तसेच विद्यार्थ्यांच्या सुरक्षिततेचा प्रश्न लक्षात घेता  स्थानिक रहिवाशांची महत्त्वपूर्ण बैठक पार पडली. या बैठकीत परिसरातील सुरक्षा व्यवस्था अधिक कडक करण्याचा एकमताने निर्णय घेण्यात आला. यानुसार शिवाजीनगरमध्ये येणाऱ्या अनोळखी तरुण मुला-मुलींची आवश्यक ती चौकशी करण्यात येणार असून, भरधाव वेगाने वाहन चालविणे, ट्रिपल सीट प्रवास तसेच मोठा आवाज करणाऱ्या गाड्यांबाबत थेट पोलीस स्टेशनला तक्रार करण्यात येणार आहे. यापुढे भाडेकरी विद्यार्थी, विद्यार्थिनी तसेच बाहेरून येणाऱ्या तरुणांवर शिवाजीनगरमधील रहिवाशांची करडी नजर राहणार असल्याचे स्पष्ट करण्यात आले.

बैठकीत शिवाजीनगर परिसरातील सर्व रूम चालक, अकॅडमी/क्लास संचालक व हॉस्टेल संचालकांसाठी कठोर नियमावली जाहीर करण्यात आली. विद्यार्थ्यांना रूम देताना किंवा क्लासमध्ये प्रवेश देताना विद्यार्थ्यांचे आधारकार्ड (झेरॉक्स प्रत), पालकांचे आधारकार्ड (झेरॉक्स प्रत), विद्यार्थ्यांचे पासपोर्ट साईज फोटो तसेच पालकांचे पासपोर्ट साईज फोटो घेणे बंधनकारक राहील. याशिवाय रूम, हॉस्टेल व क्लासचे सर्व नियम आणि वेळेचे निर्बंध विद्यार्थ्यांकडून लेखी स्वरूपात स्वाक्षरीसह घेणे आवश्यक राहील. परिसरातील सर्व हॉस्टेल, क्लास व रूम ठिकाणी सीसीटीव्ही कॅमेरे बसविणे अनिवार्य करण्यात आले असून ते कार्यान्वित स्थितीत ठेवण्याच्या सूचनाही देण्यात आल्या आहेत. परिसरात कोणतीही अनोळखी व्यक्ती आढळल्यास तत्काळ विचारपूस करून आवश्यक ती खबरदारी घेण्याचे आवाहन करण्यात आले आहे.

विद्यार्थ्यांची सुरक्षितता, महिलांचा सन्मान आणि परिसरातील शांतता राखणे ही सर्वांची सामूहिक जबाबदारी असल्याचे बैठकीत अधोरेखित करण्यात आले. या बैठकीस नगरसेविका मीराताई शिंदे, नगरसेवक प्रशांत गोरे, विनायक ससाने सर, बाळासाहेब दुतारे, लाटे-औटी मॅडम, पारे सर, खरसडे सर, सुभाष आढाव आदी सोसायटी मंडळ  तसेच शिवाजीनगरमधील रहिवासी मोठ्या संख्येने उपस्थित होते. नागरिकांच्या या एकजुटीमुळे शिवाजीनगर परिसर अधिक सुरक्षित, शिस्तबद्ध आणि सुरक्षित वातावरण निर्माण होईल, असा विश्वास व्यक्त करण्यात आला.