संघर्षक्रांती वृत्तवेध - श्रीगोंदा 

दि.7 मे 2026

(उज्वला उल्हारे)

राज्यात शेतकऱ्यांना सर्वाधिक बाजारभाव देणारा म्हणून ओळखला जाणारा ओंकार साखर कारखाना उद्योग समूह सध्या प्रगतीच्या शिखरावर असून, राज्यासह देशभरात आपली दमदार घोडदौड सुरू ठेवत आहे. या उद्योग समूहामार्फत सध्या १७ साखर कारखाने यशस्वीपणे चालवले जात असून, यावर्षी जवळपास ७५ लाख टन ऊस गाळप करण्यात आले आहे. चालू गळीत हंगामात १ कोटी टन गाळपाचा टप्पा गाठण्याचे उद्दिष्ट ठेवण्यात आले आहे.

महाराष्ट्रासह कर्नाटक, तेलंगणा आणि उत्तर प्रदेशमध्येही या उद्योग समूहाचे कारखाने कार्यरत आहेत. उद्योग समूहाशी सुमारे १८ हजार कामगार, हजारो ट्रॅक्टर-ट्रक चालक, मुकादम व ठेकेदार जोडले गेले असून, लाखो शेतकरी या व्यवस्थेशी निगडीत आहेत. बंद पडलेले अनेक साखर कारखाने पुन्हा सुरू करून काटकसरीचे नियोजन व सक्षम प्रशासन यामुळे उद्योग समूहाने वेगळी ओळख निर्माण केली आहे. बाबुराव बोत्रे पाटील यांच्या नेतृत्वाखाली शेतकरी, कामगार व वाहतूकदारांना वेळेत आणि सर्वाधिक दराने पेमेंट देण्याची परंपरा कायम ठेवण्यात आली आहे.

दरम्यान, मागील काही दिवसांत सोशल मीडियावरून उद्योग समूह व नेतृत्वाची जाणीवपूर्वक बदनामी करण्याचा प्रयत्न होत असल्याचे निदर्शनास आले आहे. २ ते ३ हजार कोटी रुपये थकीत आहेत अशा प्रकारची खोटी व दिशाभूल करणारी माहिती पसरवली जात असल्याचा आरोप करण्यात आला आहे. प्रत्यक्षात, राज्यातील सुमारे १४० साखर कारखान्यांकडे १५ जानेवारीनंतरची सुमारे २१०० कोटी रुपयांची FRP प्रलंबित आहे.

ओंकार उद्योग समूहाने मात्र आपल्या १७ कारखान्यांतून आजपर्यंत १८३० कोटी रुपये शेतकऱ्यांना अदा केले असून, वाहतूकदारांना ७१० कोटी रुपये देण्यात आले आहेत. यंदाच्या हंगामात समूहाचा एकूण टर्नओव्हर ६ हजार कोटी रुपयांपर्यंत पोहोचला असून, पुढील वर्षी तो किमान ७ हजार कोटी रुपयांपर्यंत जाण्याचा अंदाज व्यक्त करण्यात आला आहे.

ऊस बिलांबाबत पसरवल्या जाणाऱ्या अफवांमुळे शेतकऱ्यांमध्ये संभ्रम निर्माण करून कारखान्याची प्रतिमा मलिन करण्याचा प्रयत्न होत असल्याचे सांगत, अशा समाजविघातक घटकांविरोधात राज्यभरात अनेक ठिकाणी गुन्हे दाखल करण्यात आले आहेत. सर्व शेतकरी, कामगार व वाहतूकदारांनी अफवांवर विश्वास न ठेवता अधिकृत माहितीसाठी थेट कारखान्याशी संपर्क साधावा, असे आवाहन उद्योग समूहाच्या वतीने ओमराजे बोत्रे पाटील यांनी केले आहे.

चौकट - सोशल मीडियावरून चुकीची माहिती प्रसारित करून उद्योग समूहाची बदनामी केल्याप्रकरणी संबधितावर लवकरच अब्रूनुकसानीचा दावा दाखल करण्यात येणार असल्याची माहिती ओमराजे बोत्रे पाटील यांनी दिली.

तसेच केंद्र सरकारच्या नव्या धोरणानुसार पेट्रोल-डिझेलमध्ये ३३% इथेनॉल मिश्रण लागू होत असल्यामुळे यंदाचे इथेनॉल व मोलॅसिस अद्याप विक्री झालेले नाही. त्याचे सुमारे ६०० कोटी रुपये उद्योग समूहाला येणे बाकी आहेत.

यामुळे उसाच्या पेमेंटमध्ये केवळ महिनाभराचा विलंब झाला असला, तरी पुढील आठवड्यात शेतकरी, कामगार व वाहतूकदारांचे एकही रुपये थकित राहणार नाहीत, असा विश्वास व्यक्त करण्यात आला आहे. भविष्यात देशभरात २२ कारखाने चालवण्याचा तसेच पुढील हंगामात मोठ्या प्रमाणावर गाळप वाढवण्याचा मानसही व्यक्त करण्यात आला आहे.