संघर्षक्रांती वृत्तवेध - श्रीगोंदा 

दि. 7 जून 2026

(उज्वला उल्हारे)

जामखेड : अहिल्यानगर जिल्ह्यात अवैध धंद्यांविरोधात सुरू असलेल्या विशेष मोहिमेअंतर्गत स्थानिक गुन्हे शाखेने जामखेड तालुक्यात मोठी कारवाई करत अवैधरित्या देशी व विदेशी मद्याची विक्री करणाऱ्या व्यक्तीस ताब्यात घेतले आहे. या कारवाईत तब्बल ४२ हजार ५०० रुपये किमतीचा मद्यसाठा जप्त करण्यात आला असून आरोपीविरुद्ध महाराष्ट्र दारूबंदी कायद्यान्वये गुन्हा दाखल करण्यात आला आहे.

पोलीस अधीक्षक मुम्मका सुदर्शन यांनी जिल्ह्यातील अवैध व्यवसायांवर कठोर कारवाई करण्याचे आदेश दिले आहेत. त्यानुसार स्थानिक गुन्हे शाखेचे पोलीस निरीक्षक किरणकुमार कबाडी यांच्या नेतृत्वाखाली पोलीस उपनिरीक्षक समीर अभंग तसेच पोलीस अंमलदार संतोष साबळे व शामसुंदर जाधव यांचे विशेष पथक तयार करण्यात आले होते.

सदर पथक जामखेड पोलीस ठाण्याच्या हद्दीत अवैध धंद्यांची माहिती संकलित करण्यासाठी गस्त घालत असताना गुप्त बातमीदारामार्फत महत्त्वाची माहिती प्राप्त झाली. अरणगाव शिवारातील साई हॉटेल येथे एक व्यक्ती बेकायदेशीरपणे देशी व विदेशी मद्याची विक्री करत असल्याची माहिती मिळताच पथकाने तात्काळ घटनास्थळी धाव घेत छापा टाकला.

चौकट - छाप्यामध्ये रविकांत दत्तात्रय भोगे (वय ४१), रा. अरणगाव, ता. जामखेड, जि. अहिल्यानगर यास ताब्यात घेण्यात आले. त्याच्या ताब्यातून विविध प्रकारच्या देशी व विदेशी मद्याच्या बाटल्या असा एकूण ४२ हजार ५०० रुपये किमतीचा मुद्देमाल जप्त करण्यात आला.

या प्रकरणी आरोपीविरुद्ध जामखेड पोलीस ठाण्यात महाराष्ट्र दारूबंदी कायदा कलम ६५ (ई) अन्वये गुन्हा दाखल करण्यात आला असून पुढील तपास जामखेड पोलीस करत आहेत.

जिल्ह्यात अवैध मद्यविक्री, जुगार, मटका व इतर बेकायदेशीर व्यवसायांविरोधात पोलीस प्रशासनाने धडक मोहीम सुरू ठेवली असून अशा कारवायांमुळे अवैध धंदे करणाऱ्यांमध्ये खळबळ उडाली आहे. स्थानिक गुन्हे शाखेच्या या कारवाईचे सर्व स्तरांतून कौतुक होत आहे.

सदर कारवाई पोलीस अधीक्षक मुम्मका सुदर्शन यांच्या मार्गदर्शनाखाली स्थानिक गुन्हे शाखेचे पोलीस निरीक्षक किरणकुमार कबाडी व त्यांच्या पथकाने यशस्वीरीत्या पार पाडली.