संघर्षक्रांती वृत्तवेध - श्रीगोंदा 

दि. 9 मे 2026

(उज्वला उल्हारे)

महाराष्ट्राच्या शैक्षणिक, सामाजिक आणि ग्रामीण विकासाच्या इतिहासात मोलाचे योगदान देणाऱ्या रयत शिक्षण संस्था च्या सर्वोच्च निर्णयप्रक्रियेतील मानाच्या समजल्या जाणाऱ्या मॅनेजिंग कौन्सिल या महत्त्वपूर्ण समितीवर श्रीगोंदा येथील ज्येष्ठ नेते तसेच जिल्हा परिषदेचे माजी अध्यक्ष बाबासाहेब भोस यांची बिनविरोध निवड झाली आहे. या निवडीमुळे संपूर्ण श्रीगोंदा तालुक्यात आनंदाचे आणि अभिमानाचे वातावरण निर्माण झाले असून, विविध स्तरांतून त्यांच्यावर अभिनंदनाचा वर्षाव होत आहे.

कर्मवीर भाऊराव पाटील यांच्या विचारातून आणि सर्वसामान्यांना शिक्षणाच्या मुख्य प्रवाहात आणण्याच्या ध्येयातून उभी राहिलेली रयत शिक्षण संस्था आज राज्यातील सर्वात मोठ्या आणि प्रतिष्ठित शैक्षणिक संस्थांपैकी एक म्हणून ओळखली जाते. ग्रामीण भागातील विद्यार्थ्यांना शिक्षणाची संधी उपलब्ध करून देत लाखो विद्यार्थ्यांचे भविष्य घडवणाऱ्या या संस्थेच्या मॅनेजिंग कौन्सिलवर निवड होणे हे अत्यंत प्रतिष्ठेचे आणि जबाबदारीचे पद मानले जाते.

मॅनेजिंग कौन्सिल ही संस्थेची सर्वोच्च धोरणात्मक निर्णय घेणारी समिती असून, शाळा-महाविद्यालयांच्या कामकाजावर देखरेख ठेवणे, नवीन शैक्षणिक प्रकल्पांना मंजुरी देणे, आर्थिक नियोजन करणे, प्रशासनिक धोरणे ठरवणे आणि संस्थेच्या सर्वांगीण विकासाला दिशा देणे अशा महत्त्वपूर्ण जबाबदाऱ्या या समितीमार्फत पार पाडल्या जातात. त्यामुळे या समितीवर बाबासाहेब भोस यांची झालेली निवड ही त्यांच्या नेतृत्वगुणांची, शैक्षणिक जाणिवेची आणि सामाजिक कार्यातील अनुभवाची मोठी दखल मानली जात आहे.

ग्रामीण भागातील शिक्षणविकास, विद्यार्थ्यांसाठी आवश्यक सुविधा उपलब्ध करून देणे, शिक्षणाची गुणवत्ता वाढवणे तसेच संस्थेच्या कार्याला अधिक गती देण्यासाठी बाबासाहेब भोस यांचा अनुभव निश्चितच महत्त्वपूर्ण ठरणार असल्याची भावना शिक्षण क्षेत्रातून व्यक्त होत आहे.

चौकट - सामाजिक, राजकीय आणि शैक्षणिक क्षेत्रात शांत, संयमी आणि अभ्यासू नेतृत्व म्हणून ओळख असलेल्या बाबासाहेब भोस यांच्या या बिनविरोध निवडीमुळे श्रीगोंदा तालुक्याचा मान राज्यपातळीवर उंचावला आहे. त्यांच्या माध्यमातून रयत शिक्षण संस्थेच्या कार्याला नवी ऊर्जा आणि बळकटी मिळेल, असा विश्वास व्यक्त केला जात असून, त्यांच्या पुढील कार्यासाठी सर्व स्तरांतून शुभेच्छा दिल्या जात आहेत.