संघर्षक्रांती वृत्तवेध - श्रीगोंदा 

दि. 7 जून 2026

(उज्वला उल्हारे)

 पोस्टल कर्मचारी संघटनेच्या कार्यात उल्लेखनीय योगदान देत कर्मचारी हितासाठी सातत्याने कार्यरत असलेले पोस्टमास्तर तथा पोस्टल संघटनेचे कार्याध्यक्ष संतोष चंद्रकांत यादव यांची नुकतीच कल्याण येथे संपन्न झालेल्या पोस्टल संघटनेच्या अधिवेशनात कार्याध्यक्षपदी फेरनिवड झाल्याबद्दल त्यांचा श्री विशाल गणपती देवस्थान ट्रस्ट, माळीवाडा यांच्या वतीने विशेष सत्कार करण्यात आला.

माळीवाडा पंचमंडळ देवस्थान व धर्मार्थ ट्रस्टच्या वतीने आयोजित करण्यात आलेल्या या सत्कार सोहळ्यात संतोष यादव यांच्या सामाजिक, संघटनात्मक आणि प्रशासकीय कार्याचा गौरव करण्यात आला. पोस्टल विभागातील कर्मचारी, अधिकारी आणि सर्वसामान्य नागरिकांशी समन्वय साधत संघटनेच्या माध्यमातून विविध प्रश्न सोडविण्यासाठी त्यांनी दिलेल्या योगदानाची उपस्थित मान्यवरांनी प्रशंसा केली.

यावेळी श्री विशाल गणपती देवस्थान ट्रस्टचे विश्वस्त तथा शहर सहकारी बँकेचे उपाध्यक्ष प्रा. माणिकराव विधाते यांनी संतोष यादव यांना शाल, श्रीफळ व सन्मानचिन्ह देऊन गौरव केला. तसेच ट्रस्टचे विश्वस्त गदादे सर यांच्यासह इतर मान्यवर उपस्थित होते.

सत्काराला उत्तर देताना संतोष यादव यांनी व्यक्त केलेल्या भावना सांगताना, पोस्टल कर्मचाऱ्यांच्या न्याय्य मागण्या, सेवा सुविधा आणि संघटनात्मक बळकटीसाठी भविष्यातही अधिक जोमाने कार्यरत राहण्याचा निर्धार व्यक्त केला. मिळालेला सन्मान ही अधिक जबाबदारी असल्याचे सांगत त्यांनी ट्रस्टचे आभार मानले.

चौकट- प्रा. माणिकराव विधाते यांनी आपल्या मनोगतात सांगितले की, शासकीय सेवेत कार्यरत असताना प्रामाणिकपणा, कर्तव्यदक्षता आणि समाजाभिमुख दृष्टिकोन जपणारे अधिकारी समाजासाठी प्रेरणादायी ठरतात. संतोष यादव यांनी पोस्टल विभागात कार्य करताना कर्मचारी आणि नागरिक यांच्यात विश्वासाचे नाते निर्माण केले असून त्यांची कार्याध्यक्षपदी झालेली फेरनिवड ही त्यांच्या नेतृत्वक्षमतेची पावती असल्याचे त्यांनी नमूद केले.

उपस्थित मान्यवरांनी संतोष यादव यांच्या कार्याचा गौरव करत त्यांना पुढील वाटचालीसाठी शुभेच्छा दिल्या. पोस्टल विभागातील कर्मचारी हिताचे प्रश्न सोडविण्यासाठी तसेच संघटनेला अधिक सक्षम करण्यासाठी त्यांच्या नेतृत्वाचा लाभ होईल, असा विश्वास व्यक्त करण्यात आला.

या सत्कार सोहळ्यामुळे पोस्टल क्षेत्रात कार्यरत असलेल्या कर्मचाऱ्यांमध्ये उत्साहाचे वातावरण निर्माण झाले असून संतोष यादव यांच्या यशाबद्दल विविध स्तरांतून अभिनंदनाचा वर्षाव होत आहे.