संघर्षक्रांती वृत्तवेध - श्रीगोंदा 

दि. 27 जुलै 2026

(उज्वला उल्हारे)

शिक्षक आमदार किशोरभाऊ दराडे यांनी जामखेड येथील मुख्याध्यापक दत्ता काळे यांच्या निवासस्थानी सदिच्छा भेट देत शिक्षक व शिक्षकेतर कर्मचाऱ्यांच्या विविध प्रश्नांवर सविस्तर चर्चा केली. यावेळी शिक्षण क्षेत्रातील विविध घडामोडी, शिक्षकांच्या प्रलंबित मागण्या, संघटनात्मक प्रश्न तसेच शिक्षणव्यवस्था अधिक सक्षम करण्यासाठी आवश्यक उपाययोजनांवर सखोल विचारमंथन करण्यात आले.

प्रारंभी मुख्याध्यापक दत्ता काळे यांनी शिक्षक आमदार किशोरभाऊ दराडे यांचे स्वागत करून जामखेड तालुक्यातील शिक्षण क्षेत्राची सद्यस्थिती, विविध शाळांपुढील अडचणी, शिक्षक व शिक्षकेतर कर्मचाऱ्यांच्या समस्या तसेच त्यावर उपाययोजना करण्याबाबतची माहिती दिली. उपस्थित शिक्षकांनीही विविध शैक्षणिक, प्रशासकीय व संघटनात्मक विषयांवर आपली मते मांडत समस्या सोडविण्यासाठी सकारात्मक प्रयत्न करण्याची अपेक्षा व्यक्त केली.

यावेळी शिक्षक आमदार किशोरभाऊ दराडे यांनी शिक्षक व शिक्षकेतर कर्मचाऱ्यांच्या न्याय्य मागण्यांसाठी आपण विधानपरिषदेसह विविध स्तरांवर सातत्याने आवाज उठवत असून, भविष्यातही त्यांच्या हक्कांसाठी कटिबद्ध राहणार असल्याची स्पष्ट भूमिका व्यक्त केली. शिक्षण क्षेत्रातील प्रश्न सोडविण्यासाठी शासनस्तरावर आवश्यक पाठपुरावा सुरू ठेवण्याचे आश्वासनही त्यांनी दिले.

यानंतर उपस्थित मान्यवरांनी स्नेहभोजनाचा आस्वाद घेत आपुलकीच्या वातावरणात विविध शैक्षणिक, सामाजिक व संघटनात्मक विषयांवर विचारांची देवाणघेवाण केली. शिक्षण व्यवस्थेची गुणवत्ता वाढविण्यासाठी शिक्षक, मुख्याध्यापक, पालक आणि प्रशासन यांनी समन्वयाने कार्य करण्याची गरज असल्याचे मत यावेळी व्यक्त करण्यात आले.

चौकट - या प्रसंगी शिक्षण क्षेत्राशी संबंधित अनेक मान्यवर उपस्थित होते. त्यामध्ये संजय वराट, बी. ए. पारखे, दत्ता काळे, दशरथ कोपनर, आप्पा शिरसाट, भरत लहाने, दत्तात्रय राजमाने, सोमनाथ राजुंडे, वैभव सांगळे, अशोक आढाव यांच्यासह अनेक मुख्याध्यापक, शिक्षक व शिक्षकेतर कर्मचारी उपस्थित होते. उपस्थितांनी शिक्षणव्यवस्था अधिक सक्षम करण्यासाठी सामूहिक प्रयत्नांची आवश्यकता अधोरेखित केली.

संपूर्ण भेटीदरम्यान अत्यंत आपुलकीचे, स्नेहपूर्ण व सकारात्मक वातावरण अनुभवायला मिळाले. शिक्षण क्षेत्रातील विविध प्रश्नांवर विधायक चर्चा झाल्याने शिक्षक व शिक्षकेतर कर्मचाऱ्यांमध्ये समाधानाचे वातावरण निर्माण झाले असून, या भेटीमुळे भविष्यात शिक्षण क्षेत्राच्या विकासासाठी अधिक प्रभावी समन्वय साधला जाईल, असा विश्वास उपस्थितांनी व्यक्त केला.