संघर्षक्रांती वृत्तवेध - श्रीगोंदा 

दि. 1ऑगस्ट 2026

(उज्वला उल्हारे)

 साहित्यरत्न लोकशाहीर अण्णाभाऊ साठे यांच्या १०४ व्या जयंतीनिमित्त घोगरगाव येथे अभिवादनाचा कार्यक्रम उत्साहात संपन्न झाला. यावेळी घोगरगावचे मा. सरपंच बाळासो उगले यांनी आजच्या सामाजिक वास्तवावर भाष्य करत लोकशाहीर अण्णाभाऊ साठे यांच्या विचारांची आणि साहित्याची आज पूर्वीपेक्षाही अधिक गरज असल्याचे प्रतिपादन केले.

आपल्या मनोगतात ते म्हणाले, आज देश महासत्ता होण्याची स्वप्ने पाहत आहे. कृत्रिम बुद्धिमत्ता, डिजिटल क्रांती, अवकाश संशोधन आणि आधुनिक विकासाच्या गप्पा रंगत असल्या, तरी दुसऱ्या बाजूला शेतकरी कर्जाच्या ओझ्याखाली दबला आहे. कष्टकरी घाम गाळूनही न्याय मोबदल्यापासून वंचित आहे. बेरोजगार तरुण संधीच्या प्रतीक्षेत आहे. महिलांवरील अत्याचार, सामाजिक विषमता, भ्रष्टाचार आणि अन्यायाची मालिका अजूनही थांबलेली नाही. अशा वेळी अण्णाभाऊ साठे यांचे साहित्य समाजाला जागे करणारा इशारा ठरते.

ते पुढे म्हणाले, अण्णाभाऊंनी आपल्या लेखणीला कधीही सत्तेची गुलामगिरी करू दिली नाही. त्यांनी शोषित, वंचित आणि कष्टकरी समाजाच्या वेदनांना शब्द दिले. त्यांचे प्रत्येक लिखाण अन्यायाच्या छाताडावर घाव घालणारे होते. त्यामुळे फकीरा हा केवळ कादंबरीतील नायक नसून अन्यायाविरुद्ध उभा राहणाऱ्या प्रत्येक स्वाभिमानी माणसाचे प्रतीक आहे.

सध्याच्या सामाजिक परिस्थितीवर भाष्य करत त्यांनी सांगितले की, आज जातीच्या नावावर द्वेष, धर्माच्या नावावर वैमनस्य, पैशाच्या बळावर माणुसकीचा लिलाव आणि सत्तेसाठी मूल्यांची तडजोड होताना दिसते. त्यामुळे अण्णाभाऊंची लेखणी पुन्हा हातात घेण्याची गरज आहे. त्यांचे साहित्य संघर्ष शिकवते, स्वाभिमान जागवते आणि माणसाला माणूस म्हणून जगण्याची प्रेरणा देते.

चौकट - यावेळी उपस्थितांनी लोकशाहीर अण्णाभाऊ साठे यांच्या प्रतिमेस पुष्पहार अर्पण करून विनम्र अभिवादन केले. त्यांच्या साहित्य, शाहिरी आणि सामाजिक परिवर्तनाच्या कार्याला उजाळा देत त्यांच्या विचारांचा वारसा जतन करण्याचा संकल्प व्यक्त करण्यात आला.

कार्यक्रमास मा. सरपंच बाळासो उगले, मा. कुकडी संचालक बिभीषण उगले, अर्जुन उगले गुरुजी, मा.उपसरपंच बक्षुद्दीन शेख, राजे संभाजी संस्थेचे चेअरमन तानाजी बोरुडे, सामाजिक कार्यकर्ते गणेश बेरड, युवा उद्योजक निलेश उगले, साजन उगले, महादेव वाबळे, आयुब शेख, संदीप उगले, ज्येष्ठ कार्यकर्ते बबन उल्हारे तसेच ग्रामस्थ व समाजबांधव बहुसंख्येने उपस्थित होते.

कार्यक्रमाच्या शेवटी अण्णाभाऊ साठे यांच्या समता, स्वाभिमान, बंधुता आणि सामाजिक न्यायाच्या विचारांचा प्रसार करून ते प्रत्यक्ष आचरणात आणण्याचा निर्धार उपस्थितांनी व्यक्त केला.